قالالىق ءماسليحاتتىڭ كەزەكتەن تىس سەسسياسىندا وبلىس ورتالىعىنداعى تۇرعىن ۇيلەردىڭ اۋلالارىن اباتتاندىرۋ جايلى ايتىلدى. جالپى, 300-دەن استام اۋلانىڭ جولدارى جونگە كەلتىرىلىپ, اسفالت توسەلگەن. ءماسليحاتتا بەكىتىلگەن جوسپارعا سايكەس 5 تۇراقتى كوميسسيا جۇمىس ىستەۋدە.
وتكەن جىلى 45 تۇراقتى كوميسسيا وتىرىسى وتكىزىلىپ, وندا 90 ماسەلە قارالعان. سونىمەن قاتار, 400-گە تارتا كوشپەلى وتىرىس وتكىزىلگەن. دەپۋتاتتار قوعامدىق كولىكتەردە قىزمەت كورسەتۋ ساپاسىن باقىلاپ, مۇمكىندىگى شەكتەۋلى جانداردىڭ ءجۇرىپ-تۇرۋى ءۇشىن جاسالعان جاعدايعا نازار اۋدارعان. تۇرعىنداردان كەلىپ تۇسكەن وتىنىشتەر نەگىزىندە جەرگىلىكتى اتقارۋشى ورگاندارعا 158 دەپۋتاتتىق حات جولدانىپتى.
سونىمەن بىرگە, قالالىق ءماسليحات دەپۋتاتتارى قايىرىمدىلىق شارالارىنا قاتىسقان. ولار «تەگىن IT-سىنىپتار» جانە «مەكتەبىمە تاعزىم» جوبالارى اياسىندا بىرنەشە دەپۋتات مەكتەپتەرگە كومپيۋتەرلەر ساتىپ الۋ ءۇشىن 3 ميلليون تەڭگە كولەمىندە دەمەۋشىلىك كورسەتكەن.
سونداي-اق, جەلەزين اۋدانى الاكول ورتا مەكتەبىنە سمارت-تەلەديدار سىيعا تارتسا, باياناۋىل اۋىلىندا تاريح كابينەتى اشىلدى.ءتىپتى, سۋ تاسقىنىنان زارداپ شەككەن شىعىس قازاقستان وبلىسىنىڭ تۇرعىندارىنا قۇرىلىس ماتەريالدارىن جونەلتتى. وبلىس ورتالىعىنداعى شاعىن اۋدان تۇرعىندارى دا كومەك كورسەتتى. جالپى, وتكەن جىلى دەپۋتاتتار قايىرىمدىلىق شارالارىنا 12 ميلليوننان استام تەڭگە قارجى جۇمساعان.
فاريدا بىقاي,
«ەگەمەن قازاقستان»
پاۆلودار